«Motxila Durangon Bete» kanpaina
«Eskolara itzuli» kanpaina ezaguna aprobetxatuz, Durangoko ikastetxeek eta Dendak Bai elkarteak «Motxila Durangon bete» kanpaina jarriko dugu martxan.
Lehen hezkuntza eskaintzen duten sei ikastetxeekin batera (Kurutziaga Ikastola, Landako Eskola, Nevers Ikastetxea, San Antonio Ikastetxea, San Jose Jesuitak Ikastetxea eta Zabalarra Eskola), urte sasoi honetan tokiko kontsumoa eta kontsumo arduratsua balioesteko, eta tokiko merkataritzan erosketak bultzatzeko komunikazio-kanpaina hau abiarazi dugu.
Eskola-adineko neska-mutilen adierazgarri den motxila baten irudiarekin, Durangon betetzera gonbidatzen dugu, moda, ipuinak, kirola, kultura, askaria, jolasak, artea eta musikarekin, besteak beste.
Irudi koloretsu hori ikastetxeetan eta saltokietan ikus daiteke, baita tokiko hedabideetan eta sare sozialetan ere.
Azken urteotan, ikasleen bisitak saltokietara antolatu ditugu, ikastetxeek opari-txartelak oparitu dituzte herriko dendetan gastatzeko… Lankidetza puntual horiek gero eta ohikoagoak dira, baina oraingoan urrats bat gehiago ematen da, alde guztiak ekintza berean biltzen baitira.
Ikuspegi berarekin lan egitea ezinbestekoa da aurrera egiteko eta herri batek behar duen aberastasun ekonomiko eta sozial horri bizirik eusteko. Alderdiak hainbat esparrutakoak diren heinean, baina herrian eragile garrantzitsuak diren heinean, hainbat balio partekatzen dira: hurbiltasuna, konfiantza, iraunkortasuna… Eta espero da lankidetza hori hemendik aurrera emango diren askoren hasiera baino ez izatea.
Kanpaina honek Durangoko Udalaren eta Eusko Jaurlaritzako Turismo, Merkataritza eta Kontsumo Sailaren laguntza du.